Naxçıvan Muxtar Respublikasının İqtisadiyyat Nazirliyi yanında Dövlət Vergi Xidməti vakant vəzifələrə işə qəbulla bağlı müsabiqə elan edir

Dövlət vergi orqanlarına işə qəbulla bağlı müsabiqənin keçirilməsi qaydaları

Dövlət vergi orqanlarına xidmətə qəbul “Azərbaycan Respublikasının 12 iyun 2001-ci il tarixli 141-IIQ nömrəli Qanunu ilə təsdiq edilmiş “Dövlət vergi orqanlarında xidmət haqqında Əsasnamə”yə, Azərbaycan Respublikası Prezidentinin 15 aprel 2005-ci il tarixli 222 nömrəli Fərmanı ilə təsdiq edilmiş “Dövlət vergi orqanlarına işə qəbul olunmaq üçün namizədlərin müsabiqəsinin keçirilməsi haqqında Əsasnamə”yə və Azərbaycan Respublikasının İqtisadiyyat Nazirliyi yanında Dövlət Vergi Xidmətinin (DVX) 18.03.2022-ci il tarixli 2217040100301500 nömrəli əmri ilə təsdiq edilmiş “Dövlət vergi orqanlarına işə qəbul olunmaq üçün namizədlərin sənədlərinin toplanması, vakant vəzifələrin tutulması üçün kadr ehtiyatının formalaşdırılması və idarə edilməsi Qaydaları”na müvafiq olaraq aparılır. 

Müsabiqədə iştirak etmək üçün namizədlərə dair tələblər

Müsabiqədə iştiraka ali təhsilə malik (qeyri-hüquq sahələri üzrə müraciət edən namizədlər üçün ixtisas tələbi yoxdur), yaşı 35-i keçməmiş (“Dövlət vergi orqanlarına işə qəbul olunmaq üçün namizədlərin müsabiqəsinin keçirilməsi haqqında Əsasnamə”nin 1.7-ci bəndində göstərilən şəxslər üçün müəyyən olunmuş yaş həddi tətbiq edilmir) Azərbaycan Respublikasının vətəndaşları buraxılırlar.

Aşağıdakı hallarda vətəndaşlar dövlət vergi orqanlarında xidmətə qəbul oluna bilməzlər:

• Məhkəmənin qanuni qüvvəyə minmiş qərarı ilə məhdud fəaliyyət qabiliyyətli və ya fəaliyyət qabiliyyəti olmayan hesab edildikdə;
• Məhkumluğu ödənilmədikdə və ya götürülmədikdə;
• Çağırış yaşlı vətəndaşlar qanunla müəyyən olunmuş müddətli həqiqi hərbi xidmət keçmədikdə (qanuni əsaslarla müddətli həqiqi hərbi xidmətə çağırışdan möhlət hüququ olanlar və ya müddətli həqiqi hərbi xidmətə çağırışdan azad edilənlər istisna olmaqla).

Müsabiqədə iştirak etmək üçün tələb olunan sənədlər

• Rəsmi internet səhifələrinə (www.taxes.gov.az və www.ntaxes.gov.az) daxil olaraq doldurulan elektron ərizə forması;
• Ali təhsil haqqında dövlət sənədinin (xaricdə təhsil almış namizədlər üçün təhsil haqqında sənədlərin (xarici dövlətlərin ali təhsilə aid kvalifikasiyalarının) tanınması ilə bağlı müvafiq sənədin) surəti;
• Məhkumluğun olmaması barədə arayışın surəti (müvafiq arayışın verilmə tarixi son 6 (altı) ayı əhatə etməlidir).

Müsabiqədə iştirakla bağlı sənəd qəbulu

• Müsabiqəyə sənəd qəbulu elektron ərizə vasitəsilə 18.03.2025-ci il saat 10:00-dan 18.04.2025-ci il saat 23:59-dək həyata keçirilir.
• Müsabiqədə iştirak etmək istəyən vətəndaşlar göstərilən müddət ərzində rəsmi internet səhifələrində (www.taxes.gov.az və www.ntaxes.gov.az) yerləşdirilmiş elanda qeyd olunan elektron ərizə formasını doldurmalıdırlar. Ərizə formasına ali təhsil haqqında dövlət sənədinin (xaricdə təhsil almış namizədlər üçün təhsil haqqında sənədlərin (xarici dövlətlərin ali təhsilə aid kvalifikasiyalarının) tanınması ilə bağlı müvafiq sənədin) və məhkumluğun olmaması barədə arayışın surətləri mütləq qaydada fayl şəklində əlavə olunmalıdır.
• Ərizənin sistemə daxil olduğu gündən 10 iş günü müddətində namizədin müsabiqədə iştirakla bağlı qoyulan tələblərə uyğunluğunun qabaqcadan müəyyən edilməsi məqsədilə ilkin yoxlama aparılır və nəticəsi barədə namizədin elektron poçt ünvanına məlumat göndərilir.
• Namizədlər internet vasitəsi ilə elektron ərizə formasını doldura bilmədikdə və ya bu zaman hər hansı texniki problem yarandıqda, habelə ərizə ilə müraciət etdikləri müddətdən 10 iş günü keçdiyinə baxmayaraq onların elektron poçt ünvanına heç bir məlumat göndərilmədikdə 036-544-08-96 nömrəli telefonla Naxçıvan Muxtar Respublikasının İqtisadiyyat Nazirliyi yanında DVX-ya müraciət edə bilərlər. 

Müsabiqənin keçirilməsi

Qeydiyyatdan keçmiş namizədlərin siyahısı DVX tərəfindən test imtahanının keçirilməsi üçün Azərbaycan Respublikasının Dövlət İmtahan Mərkəzinə (DİM) təqdim edilir. Test imtahanda iştirak etmək üçün vətəndaşlar 22 aprel  – 6 may 2025-ci il müddətində DİM-in internet saytında (http://ekabinet.dim.gov.az) “Şəxsi kabinet”lərini yaratmalıdırlar (bax, “Şəxsi kabinet"in yaradılması və istifadə qaydası”). Şəxsi kabinetin yaradılmasl zamanı pul hesabı açılır. Vətəndaşın imtahanda iştirak etməsi üçün ödənişin məbləği 118 AZN (ƏDV daxil olmaqla) təşkil edir. “Şəxsi kabinet”də olan pul hesabına vəsait daxil etmək üçün müxtəlif ödəniş üsullarından (ətraflı məlumat burada) istifadə etmək olar.

“Şəxsi kabinet” yaradıldıqdan və hesaba lazımi vəsait daxil edildikdən sonra test imtahanında iştirak etmək üçün DİM-in internet saytında “Dövlət Vergi xidmətinə (Naxçıvan MR) vakant vəzifələrə işə qəbulla əlaqədar test imtahanında iştirak etmək üçün onlayn qeydiyyat” elektron xidməti vasitəsilə qeydiyyatdan keçmək lazımdır.

Qeydiyyat zamanı vətəndaş haqqında ümumi məlumatlar (soyad, ad, ata adı, təvəllüd) "Giriş-çıxış və qeydiyyat" idarələrarası avtomatlaşdırılmış məlumat-axtarış sistemi və vətəndaşın ali təhsili haqqında məlumatları "Tələbə-məzun" (MyGov.az) dövlət elektron məlumat sistemi vasitəsilə yoxlanılır.

Qeydiyyatdan əvvəl namizədlər təhsil haqqında məlumatlarının "Tələbə-məzun" dövlət elektron məlumat sistemində olub-olmadığını "Elektron hökumət" portalından DİM-in "Vətəndaş haqqında "Tələbə-məzun" dövlət elektron məlumat sistemindən çıxarış" elektron xidməti vasitəsilə də öyrənə bilərlər.

Sistemdə müvafiq məlumatlar olmadıqda namizədin qeydiyyatı aparılmır. Bu halda namizəd ona aid məlumatların "Tələbə-məzun" dövlət elektron məlumat sisteminə daxil edilməsi üçün bitirdiyi təhsil müəssisəsinə müraciət etməlidir. Xaricdə təhsil almış namizədlər və sistemdə məlumatları olmayan digər namizədlər DİM-ə (Bakı şəhəri, Nəsimi rayonu, Akademik Həsən Əliyev küçəsi 299 və ya DİM-in  regional bölmələrinə) müraciət etməlidirlər.

Test imtahanı 2025-ci il 17 may tarixində  DİM tərəfindən kağız formada Naxçıvan şəhərində keçiriləcək. İmtahanın başlama vaxtı saat 1100-dır. İmtahanda iştirak etmək üçün namizədlər 11 may 2025-ci il tarixindən etibarən DİM-in saytından eservices.dim.gov.az/brxv internet səhi­fəsinə daxil olaraq “İmtahana buraxılış vərəqəsi” və “Yaddaş kitabçası”nı çap edir və imtahanın keçiriləcəyi ünvan və tarixi qeyd olunan buraxılış və­rəqəsini və bakalavr ərizəsində göstərilən şəxsiyyəti təsdiq edən sənədi imtahana gələrkən hökmən özləri ilə gətirirlər.

Namizəd imtahan keçirilən binaya imtahana “İmtahana buraxılış vərəqəsi”ndə qeyd edilən vaxtda gəlməlidir. İmtahana gələrkən namizəd şəxsiyyət vəsiqəsini və “İmtahana buraxılış vərəqəsi”ni hökmən özü ilə gətirməlidir. Bu sənədlərdən hər hansı biri olmadıqda və ya imtahanın başlamasına 15 dəqiqə qalmışdan gec gəldikdə namizəd imtahana buraxılmır.

Test imtahanının sualları hüquqşünaslıq və digər ixtisaslar üzrə 2 kateqoriyaya bölünür:

• Hüquqşünaslıq ixtisası üzrə namizədlərə Qanunvericilik üzrə 55 qapalı və 5 açıq tipli, Rəqəmsal məlumatların təhlili üzrə 10 qapalı, Abstrakt və məntiqi düşünmə üzrə 20 qapalı tipli tapşırıq, Azərbaycan Respublikasının yeni tarixi və coğrafiyası üzrə 10 qapalı tipli tapşırıq, ümumilikdə 100 tapşırıq təqdim olunacaq.
• Ümumi sahə üzrə namizədlərə Qanunvericilik üzrə 20 qapalı, Rəqəmsal məlumatların təhlili üzrə 15 qapalı və 5 açıq tipli, Abstrakt və məntiqi düşünmə üzrə 40 qapalı tipli tapşırıq, Azərbaycan Respublikasının yeni tarixi və coğrafiyası üzrə 20 qapalı tipli tapşırıq, ümumilikdə 100 tapşırıq təqdim olunacaq.

İmtahanın müddəti 3 saatdır. Hər doğru cavablandırılmış test tapşırığı 1 balla qiymətləndirilir. Bir test tapşırığına iki və daha artıq cavab verildikdə cavab səhv hesab olunur. Səhv cavablar doğru cavabların nəticəsinə təsir göstərmir. İmtahanda toplanıla bilən maksimal bal 100-ə bərabərdir. Test imtahanında müvəffəqiyyət qazanmaq üçün namizədlər ən azı 70 bal toplamalıdırlar.

İmtahanda istifadə olunmuş test tapşırıqlarının imtahandan sonra keçirilən ekspertizası zamanı hər hansı səbəbdən ləğv olunmuş test tapşırığı müvafiq testdən imtahan vermiş iştirakçıların xeyrinə olaraq onlar tərəfindən düzgün cavablandırılmış tapşırıq kimi qəbul olunur. İmtahanın nəticələri ilə bağlı namizədlər DİM-də fəaliyyət göstərəcək Apellyasiya kommissiyasına 17 – 19 may tarixlərində saat 14-dən 17⁰⁰-a qədər müraciət edə bilərlər.

• Müsabiqənin test imtahanı mərhələsinin suallarını özündə əks etdirən ədəbiyyat siyahısı və sual nümunələri rəsmi internet səhifələrində (www.taxes.gov.az və www.ntaxes.gov.az) yerləşdirilmişdir. 
• Müsabiqənin test imtahanı mərhələsindən uğurla keçən, həmçinin “Dövlət vergi orqanlarına işə qəbul olunmaq üçün namizədlərin müsabiqəsinin keçirilməsi haqqında Əsasnamə”nin 1.7-ci bəndinə uyğun olaraq birbaşa müsahibə mərhələsinə buraxılan namizədlərə müsahibənin keçirildiyi yer və vaxt barədə azı 5 gün əvvəl məlumat veriləcək.
• Müsahibə namizədin müvafiq vəzifələrə uyğunluğunu müəyyən etmək üçün Müsabiqə Komissiyasının ona suallar, tapşırıqlar verməsi və namizədin həmin sualları cavablandırması, tapşırıqları yerinə yetirməsi, habelə namizədin dinlənilməsi və Müsabiqə Komissiyasının üzvlərinin müşahidə aparması yolu ilə həyata keçirilir. Müsahibə proqramı əvvəlcədən elan edilmir. 

Test imtahanında namizədlərə aşağıdakı məzmunda test tapşırıqları təqdim olunacaqdır:

• Hüquqşünaslıq ixtisasına malik olanlar üçün:

• Azərbaycan Respublikasının Konstitusiyası;
• Azərbaycan Respublikasının Konstitusiya Qanunları, Cinayət Məcəlləsi, Cinayət-Prosessual Məcəlləsi, İnzibati-Prosessual Məcəlləsi, Mülki Məcəlləsi, Mülki-Prosessual Məcəlləsi, Əmək Məcəlləsi, İnzibati Xətalar Məcəlləsi, “İnzibati icraat haqqında” Azərbaycan Respublikasının Qanunu;
• Yeni tarix və dünyagörüşü;
• Rəqəmsal məlumatların təhlili;
• Abstrakt və məntiqi düşünmə.

• Digər ixtisaslara malik olanlar üçün:

• Azərbaycan Respublikasının Konstitusiyası;
• Yeni tarix və dünyagörüşü;
• Rəqəmsal məlumatların təhlili;
• Abstrakt və məntiqi düşünmə.

QEYD: Vakant yerlərin mütəmadi yenilənməsini nəzərə alaraq müsabiqədə uğur qazanan namizədlər həmin dövr üzrə vakant olan vəzifələr üzrə dəyərləndiriləcək.