Kommersiya və publik hüquqi şəxslərin ləğv edilməsi proseduru Azərbaycan Respublikasının Mülki Məcəlləsinin və Vergi Məcəlləsinin müddəaları, "Hüquqi şəxslərin dövlət qeydiyyatı və dövlət reyestri haqqında" Azərbaycan Respublikasının Qanunu, "Dövlət vergi orqanlarında kommersiya qurumlarının dövlət qeydiyyatının və vergi ödəyicilərinin uçotunun ləğv edilməsi Qaydaları" ilə tənzimlənir.

Kağız (əlbəəl və ya poçt vasitəsi ilə).

Ərazi prinsipi nəzərə alınmaqla Naxçıvan MR Dövlət Vergi Xidmətinin Kommersiya hüquqi şəxslərin dövlət qeydiyyatı şöbəsi, DVX Milli Gəlirlər Baş İdarəsinin Hüquqi şəxslərin dövlət qeydiyyatı idarəsi, Ərazi Vergilər Baş İdarəsinin və Ərazi Vergilər İdarəsinin inzibati binalarında yerləşən vergi ödəyicilərinə xidmət mərkəzləri (maliyyə-sənaye qrupları, banklar, investisiya fondları, sığorta və auditor təşkilatları istisna olmaqla).

Mülki Məcəllənin 59-cu maddəsinə əsasən hüquqi şəxs aşağıdakı hallarda ləğv oluna bilər:

• Təsisçilərinin və ya nizamnamə ilə buna vəkil edilmiş orqanının qərarı ilə
• Hüquqi şəxsin yaradılması zamanı yol verilmiş qanunvericilik pozuntuları ilə əlaqədar onun qeydiyyatının məhkəmə tərəfindən etibarsız sayıldığı halda
• Müflis elan olunduqda

Ləğvetmə komissiyası (təsviyəçi) təyin olunduğu gündən sonra 15 gün müddətində aşağıdakı sənədləri qeydiyyat orqanına təqdim etməlidir:

• Ərizə ("Qurumun dövlət qeydiyyatından (vergi uçotundan) çıxarılması haqqında")
• Ləğvetmə barədə qərar
• Ödəmə qabiliyyətinin olmasını təsdiq edən rəsmi bəyanat
• Ləğv edilməsi və kreditorların tələblərinin bildirilməsi qaydası barədə ilk məlumatın mətbu nəşrdə dərc olunmasını təsdiq edən sənəd (müddət 60 gündən az ola bilməz)
• Möhür

Hüquqi şəxs müflis elan olunduqda məhkəmənin qanuni qüvvəyə minmiş qərarı və ya kreditorların ilkin yığıncağının qərarı da təqdim olunmalıdır.

Aşağıdakı halların mövcud olub-olmaması yoxlanılmalı və nəticə barədə məlumat verilməlidir:

• Ləğv edilən hüquqi şəxsin təsisçiliyi ilə yaradılmış hüquqi şəxslərin mövcudluğu
• ƏDV məqsədləri üçün qeydiyyatda olub-olmaması
• Filial, nümayəndəlik və ya digər təsərrüfat subyektinin vergi uçotunda olub-olmaması
• NKA-nın qeydiyyatda olub-olmaması
• POS-terminalının qeydiyyatda olub-olmaması
• Aktiv bank hesablarının olub-olmaması
• Dövlət büdcəsinə vergi borcunun olub-olmaması
• Təqdim edilməmiş bəyannamələrin (hesabatların) olub-olmaması

Ləğvetmə komissiyası (təsviyəçi) qalan əmlakın bölünməsindən sonra 10 gün ərzində aşağıdakı sənədləri təqdim etməlidir:

• Ləğvetmə balansı
• Qalıq əmlakın bölünməsi planını əks etdirən hesabat və həmin əmlakın iştirakçılara təqdim edilməsini təsdiq edən sənəd
• Hüquqi şəxsin qeydiyyat şəhadətnaməsinin və nizamnaməsinin əsli, üzərində "ləğv prosesindədir" yazılmış möhür
• Səhmdar cəmiyyətlərdə səhmlərin dövriyyədən çıxarılmasına dair Maliyyə Bazarlarına Nəzarət Palatasının arayışı
• Arxiv sənədlərinin müvafiq dövlət arxiv xidməti təşkilatına təhvil verildiyinə dair arayış

Ləğvetmə prosesinin ümumi müddəti hüquqi şəxsin ləğvetmə prosesindəki qeydin reyestrə daxil edildiyi andan etibarən bir ildən çox olmamalıdır. Həmin müddətin keçməsi ləğvetmə prosesinin yenidən başlamasına səbəb olur. Bu halda reyestrdən qeyd çıxarılmaqla təqdim edilmiş sənədlər bildirişlə ləğvetmə komissiyasına (təsviyəçiyə) qaytarılır.