Dövlət Vergi Xidməti sayca ikinci “Yay Təcrübə Proqramı”na qəbul elan edir

İqtisadiyyat Nazirliyi yanında Dövlət Vergi Xidməti (DVX) mart ayının 27-dən başlayaraq ali təhsil müəssisələrinin tələbələri üçün iki hissədən ibarət olan sayca ikinci “Yay Təcrübə Proqramı”na qəbul elan edir. Proqramda iştirak etmək istəyən tələbələr qeyd olunan tarixdən etibarən Dövlət Vergi Xidmətinə müraciət etməklə proqramın seçim turlarına qoşula bilərlər.

“Yay Təcrübə Proqramı”nın seçim turu 3 mərhələdən ibarət olacaq. 1-ci mərhələ sənəd qəbulu üzrə ilkin yoxlamanın aparılması, 2-ci mərhələ namizədlərin özünütəqdimat video çıxışlarının dəyərləndirilməsi, 3-cü mərhələ isə namizədlərin keys əsaslı qrup tapşırıqları üzrə qiymətləndirilməsi ilə bağlıdır.

Hər üç mərhələdən uğurla keçən namizədlər 7 gün müddətində DVX-nin Şamaxı rayonunda yerləşən Tədris Mərkəzində təşkil ediləcək yay düşərgəsində iştirak hüququ qazanacaqlar. Tədris Mərkəzində onlara peşəkar təlimçilər tərəfindən vergi inzibatçılığı və digər mövzularda təlimlər təşkil olunacaq. Daha sonra tələbələr DVX-nın Bakıda və regionlarda yerləşən struktur bölmələrində 8 həftə müddətində təcrübə keçəcəklər. “Yay Təcrübə Proqramı” 7 iyul 2023-cü il tarixdən 8 sentyabr 2023-cü il tarixədək davam edəcək.

Proqramda iştirak üçün sənəd qəbulu tecrube@taxes.gov.az elektron poçt ünvanı vasitəsilə martın 27-dən aprelin 30-dək həyata keçiriləcək. Müraciətlər göndərilərkən (mövzu hissəsində “Yay Təcrübə Proqramı 2023” qeyd etməklə) şəxsiyyət vəsiqəsi, tələbə bileti və akademik transkript mütləq qaydada fayl şəklində məktuba əlavə olunmalıdır.

Proqramda iştirak etmək üçün namizədlərə olan tələblər:

• Azərbaycan Respublikasının vətəndaşı olmalı;

• yerli və ya xarici dövlətlərin ali təhsil müəssisələrinin 4-cü kurs bakalavriat pilləsində, yaxud 1-ci və ya 2-ci kurs magistratura pilləsində iqtisadiyyat, hüquq, idarəetmə ixtisas istiqamətləri üzrə təhsil almalı;

• cari tədris ilinin payız semestri üzrə ümumi orta müvəffəqiyyət göstəricisi 80 baldan (4 ballıq sistem üzərindən 3 baldan) yuxarı olmalıdır.

“Yay Təcrübə Proqramı”nın əsas məqsədi tələbələrin bilik və bacarıqlarının artırılmasına, şəxsi inkişafına dəstək verməkdir. Tələbələr təcrübə proqramı vasitəsilə nəzəri biliklərini praktikada tətbiq etmək, vergi sahəsində yeni bilik və bacarıqlar formalaşdırmaq imkanı qazanacaqlar. Ötən il “Yay Təcrübə Proqramı”nda yüksək nəticələr əldə etmiş tələbələrdən 3-ü işə qəbul üzrə müsabiqədən uğurla keçərək DVX-nın ehtiyat kadrlar bazasına daxil edilib.

Ətraflı məlumat üçün linkə keçid: https://www.taxes.gov.az/az/post/2419