Yerli investisiyalı məhdud məsuliyyətli cəmiyyətlərin e-qeydiyyatının xüsusi çəkisi artıb

2021-ci ilin oktyabrın 1-nə respublika üzrə uçotda olan 1.301.903 vergi ödəyicisinin 1.143.366-sı və ya 87,8 %-i fiziki şəxs, 158.537-si və ya 12,2 %-i hüquqi şəxs və digər təşkilatlar olub. 2020-ci ilin müvafiq dövrü ilə müqayisədə vergi ödəyicilərinin ümumi sayı 9,5 % artıb ki, bu artımın 91 %-i fiziki şəxslərin, 9 %-i hüquqi şəxslərin hesabınadır. Hüquqi şəxs kimi uçotda olan vergi ödəyicilərinin sayının artması, əsasən, kommersiya qurumları hesabına baş verib (98,8 %). Qeydiyyatda olan kommersiya hüquqi şəxslərin 88,5 %-i məhdud məsuliyyətli cəmiyyət, 1,5 %-i səhmdar cəmiyyət, 1,3 %-i kooperativ və s. təşkilati-hüquqi formasındadır.

Yanvar-sentyabr aylarında 8.628 kommersiya qurumu dövlət qeydiyyatından keçib ki, bu da 2020-ci ilin müvafiq dövrü ilə müqayisədə 24,7 % çoxdur. Həmin qurumların 82,9 %-i elektron qaydada, 17,1 %-i isə kağız daşıyıcılarında müraciətləri əsasında qeydiyyata alınıb. Yerli investisiyalı məhdud məsuliyyətli cəmiyyətlərin e-qeydiyyatının xüsusi çəkisi isə 92,5 % təşkil edib.

Cari ilin sentyabr ayında 1.146 vahid kommersiya qurumu dövlət qeydiyyatından keçib ki, bu da 2020-ci ilin sentyabr ayı ilə müqayisədə 36,9 % çoxdur. Ay ərzində dövlət qeydiyyatından keçmiş kommersiya qurumlarının 960-ı elektron qaydada, 186-sı isə kağız daşıyıcılarında müraciətləri əsasında qeydiyyata alınıb.

2021-ci ilin yanvar-sentyabr aylarında qeydiyyatdan keçmiş kommersiya qurumundan 91 %-i yerli investisiyalı, 9 %-i xarici investisiyalı qurumlardır. 2020-ci ilin müvafiq dövrü ilə müqayisədə yerli investisiyalı kommersiya qurumlarının dövlət qeydiyyatının sayı 36,3 % artıb. 2021-ci ilin oktyabr ayının 1-nə 16.499 xarici investisiyalı kommersiya hüquqi şəxs dövlət qeydiyyatından keçib. Bunlardan 11.076-nın fəaliyyəti aktiv olub, 4.544-nün fəaliyyəti dayandırılıb, 879-u isə ləğv edilib.

2021-ci ilin sentyabr ayında dövlət qeydiyyatına alınmış xarici investisiyalı hüquqi şəxslərin 35,7 %-i Türkiyə, 14,3 %-i İran, 11,6 %-i Gürcüstan, 5,4 %-i Pakistan, 4,5 %-i Çin, 3,6 %-i Şri-Lanka və 2,7 %-i Rusiya investisiyalı vergi ödəyiciləridir.

Yeni qeydiyyat üsulu ilə (fin kod+mobil nömrə) cari ilin yanvar-sentyabr aylarında 1.366 yerli investisiyalı məhdud məsuliyyətli cəmiyyət (2020-ci ilin müvafiq dövrü ilə müqayisədə 61,8 % çox) qeydiyyata alınıb. Bu üsulun ümumi qeydiyyatda xüsusi çəkisi artaraq 15,8 %, yerli investisiyalı məhdud məsuliyyətli cəmiyyətlərin qeydiyyatında isə 17,7 % təşkil edib.

2021-ci ilin 1 oktyabr tarixinə 302 publik hüquqi şəxs dövlət qeydiyyatına alınıb.